Біздің компаниямыз жайлы жалпы ақпарат.
Дәрілік препаратты медициналық қолдану жөніндегі нұсқаулық
Саудалық атауы
Адвант
Халықаралық патенттелмеген атауы
Кандесартан
Дәрілік түрі, дозасы
8 мг және 16 мг таблеткалар
Фармакотерапиялық тобы
Жүрек-қантамыр жүйесі. Ренин-ангиотензин жүйесіне әсер ететін препараттар. Ангиотензин II антагонистері. Кандесартан.
АТХ коды C09CA06
Қолданылуы
Дәрілік зат ересектерде қолдануға арналған
- артериялық гипертензияны емдеу үшін (монотерапияда немесе гипертензияға қарсы басқа дәрілермен біріктіріп қолдану).
- жүректің созылмалы жеткіліксіздігінде және сол жақ қарыншаның систолалық функциясының бұзылуында (СҚЛФ < 40% төмендеуі), ангиотензин-өзгертуші фермент (АӨФ) тежегіштеріне қосымша ем ретінде немесе АӨФ тежегіштерінің жақпаушылығы кезінде.
Қолдануды бастағанға дейін қажетті мәліметтер тізбесі
Қолдануға болмайтын жағдайлар
- кандесартан цилексетиліне немесе қосымша заттарының кез келгеніне аса жоғары сезімталдық
- кандесартан цилексетилі мен құрамында алискирен бар препараттарды бір мезгілде қолдану, қант диабеті немесе бүйрек функциясының бұзылуы бар (ШСЖ < 60 мл/мин/1,73 м2) пациенттерге
- бауыр функциясының айқын бұзылулары және/немесе холестаз
- тұқым қуалайтын галактоза жақпаушылығы, Lapp (ЛАПП)-лактаза ферментінің тапшылығы, глюкоза мальабсорбциясы бар адамдарға
- жүктілік және лактация кезеңі
- балалар мен 18 жасқа дейінгі жасөспірімдер
Қолдану кезінде қажетті сақтық шаралары
Ренин-ангиотензин-альдостерон жүйесінің (РААЖ) қосарлы блокадасы
АӨФ тежегіштерін, ангиотензин II блокаторларының рецепторларын немесе алискиренді бір мезгілде қабылдау гипотензияның, гиперкалиемияның және бүйрек функциясы төмендеуінің қаупін арттыратындығы туралы деректер бар (бүйректің жедел жеткіліксіздігін қоса). Сондықтан АӨФ тежегіштерін, ангиотензин II рецепторларының блокаторларын немесе алискиренді біріктіріп қолдану жолымен жүргізілетін РААЖ қосарлы блокадасы ұсынылмайды.
Егер қосарлы блокадамен емдеу аса қажет деп есептелсе, оны тек маманның қадағалауымен және бүйрек функциясын, электролиттер мен артериялық қысымды мұқият жиі мониторингілей отырып жүргізу керек. Диабеттік нефропатиясы бар пациенттерде АӨФ тежегіштері мен ангиотензин II рецепторларының блокаторларын бір мезгілде қолданбаған дұрыс.
Бүйрек жеткіліксіздігі
Ренин-ангиотензин-альдостерон жүйесін тежейтін басқа агенттермен жағдайдағы сияқты, Адвант препаратын қабылдап жүрген сезімтал пациенттерде, бүйрек функциясының өзгерістерін күтуге болады.
Егер Адвант гипертониялық ауруы және бүйрек жеткіліксіздігі бар пациенттерде пайдаланылса, сарысудағы калий мен креатинин деңгейін мұқият бақылау ұсынылады. Бүйректің аса ауыр немесе терминальді жеткіліксіздігі бар (креатинин клиренсі <15 мл / мин) пациенттерде қолданылу тәжірибесі шектеулі. Аталған пациенттерде Адвант препаратының дозасын артериялық қысымды мұқият бақылай отырып титрлеу қажет.
Жүрек жеткіліксіздігі бар пациенттерді тексеру, әсіресе, 75 жас шамасындағы және одан егде жастағы пациенттерде, және бүйрек функциясы бұзылған пациенттерде бүйрек функциясын мезгіл-мезгіл бағалауды қамтуы тиіс. Адвант препаратының дозасын титрлеу кезінде сарысудағы креатинин мен калийді мониторингілеу ұсынылады.
Бүйрек жеткіліксіздігі бар пациенттерді қоса, педиатриялық пациенттерде қолданылу тәжірибесі
Шумақтық сүзіліс жылдамдығы 30 мл / мин / 1,73 м2 аз балаларда қолданылу тәжірибесі болмаған
Жүрек жеткіліксіздігі кезінде АӨФ тежегішімен қатарлас емдеу
Жағымсыз реакциялардың, әсіресе артериялық гипотензияның, гиперкалиемияның және бүйрек функциясы төмендеуінің (бүйректің жедел жеткіліксіздігін қоса) қаупі, Адвант препаратын АӨФ тежегішімен бірге қолданғанда жоғарылай түсуі мүмкін. АӨФ тежегішінің, минералокортикоидтық рецепторлар антагонисінің және кандесартан цилексетилінің үштік біріктірілімі де ұсынылмайды. Бұл біріктірілімдерді пайдалану маманның қадағалауымен және бүйрек функциясын, электролиттер мен артериялық қысымды жиі мониторингілей отырып жүзеге асырылуы тиіс.
Диабеттік нефропатиясы бар пациенттерде АӨФ тежегіштері мен ангиотензин II рецепторларының блокаторларын бір мезгілде қолданбаған дұрыс.
Гемодиализ
Диализ кезінде артериялық қысым плазма көлемінің азаюы мен ренин-ангиотензин-альдостерон жүйесі белсенуінің нәтижесіндегі AT1 рецепторының блокадасына ерекше сезімтал болуы мүмкін. Сол себепті Адвант препаратының дозасын гемодиализдегі пациенттерде артериялық қысымды мұқият бақылай отырып титрлеу керек.
Бүйрек артериясының стенозы
Ренин-ангиотензин-альдостерон жүйесіне әсер ететін дәрілік препараттар, соның ішінде ангиотензин II рецепторларының антагонистері бүйрек артерияларының екіжақты стенозымен немесе жалғыз бүйрек артериясының стенозымен пациенттерде қандағы мочевинаның және қан сарысуындағы креатининнің деңгейін арттыруы мүмкін.
Бүйрек трансплантациясы
Жуырда бүйрек трансплантациясын бастан өткерген пациенттерде Адвант препаратын қолдану тәжірибесі болмаған.
Гипотония
Жүрек жеткіліксіздігі бар пациенттерде Адвант препаратымен емдеу кезінде гипотония туындауы мүмкін. Бұл артериялық гипертензиясы бар және тамырішілік көлемі сарқылған пациенттерде де, мысалы, диуретиктердің жоғары дозаларын қабылдап жүрген пациенттерде орын алуы мүмкін. Емдеуді бастағанда және гиповолемияны түзетуге әрекеттенулер кезінде сақтық таныту керек.
Тамырішілік көлемі азаюы мүмкін балалар (мысалы, диуретиктерді қабылдап жүрген, әсіресе, бүйрек функциясы бұзылған пациенттер) үшін, кандесартанмен емдеуді мұқият медициналық қадағалаумен бастау керек, және төменірек бастапқы дозасын қолдану мүмкіндігін қарастыру керек.
Анестезия және хирургиялық араласым
Ангиотензин II рецепторларының антагонистерімен ем қабылдап жүрген пациенттерде, анестезия және хирургиялық араласымдар кезінде ренин-ангиотензин жүйесінің блокадасы салдарынан гипотензия дамуы мүмкін. Аса сирек жағдайларда гипотензия, тіпті венаішілік сұйықтықтарды және/немесе вазопрессорларды қолдану талап етілетіндей ауыр болуы мүмкін.
Қолқаның және митральді клапанның стенозы (обструкциялық гипертрофиялық кардиомиопатия)
Тамырды кеңейтетін басқа дәрілермен жағдайдағыдай, қолқаның немесе митральді клапанның гемодинамикалық тұрғыдан маңызды стенозымен немесе обструкциялық гипертрофиялық кардиомиопатиямен пациенттерді емдеу кезінде ерекше сақтық таныту қажет.
Бастапқы гиперальдостеронизм:
Бастапқы гиперальдостеронизммен пациенттер, әдетте, ренин-ангиотензин-альдостерон жүйесін тежеу жолымен әсер ететін, гипертензияға қарсы дәрілік заттарға жауап бермейді. Сондықтан пациенттердің осы тобында Адвант препаратын пайдалану ұсынылмайды.
Гиперкалиемия
Адвант препаратын калий жинақтайтын диуретиктермен, калий қоспаларымен, құрамында калий бар тұз алмастырғыштармен немесе қан сарысуындағы калий деңгейін жоғарылатуы мүмкін басқа дәрілік заттармен (мысалы, гепарин) бір мезгілде қолдану гипертониясы бар пациенттерде қан сарысуындағы калий деңгейінің жоғарылауына алып келуі мүмкін. Қажет болған жағдайда, калий деңгейіне мониторинг жүргізу керек.
Жүрек жеткіліксіздігі бар, Адвант препаратын қабылдаған пациенттерде гиперкалиемия дамуы мүмкін. Қан сарысуындағы калий деңгейін жүйелі түрде бақылап отыру ұсынылады. АӨФ тежегішінің, калий жинақтайтын диуретиктің (мысалы, спиронолактонның) және Адвант препаратының біріктірілімі ұсынылмайды, және оны тек, ықтимал артықшылықтары мен қауіптерін мұқият бағалағаннан кейін ғана қарастыру керек.
Ренин-ангиотензин-альдостерон жүйесі белсенділігінің тамыр тонусындағы және бүйрек функциясындағы маңызын анықтауда (мысалы, ауыр іркілген жүрек жеткіліксіздігі немесе бүйрек артерияларының стенозын қоса, бүйрек аурулары кезінде) ангиотензин ІІ рецепторларының антагонистерін қоса, осы жүйеге әсер ететін басқа да дәрілік заттармен емдеу жедел гипотензиямен, азотемиямен, олигуриямен және кейде, бүйректің жедел жеткіліксіздігімен астасқан. Гипертензияға қарсы басқа препараттармен жағдайдағыдай, жүректің ишемиялық ауыруы бар немесе атеросклероздық цереброваскулярлық ауыруы бар пациенттерде артериялық қысымның айқын төмендеуі миокард инфарктісіне немесе инсультке әкеп соқтыруы мүмкін.
Кандесартан цилексетилінің гипертензияға қарсы әсері гипертензияға қарсы басқа препараттарды қолданудың нәтижесінде жоғарылауы мүмкін.
Лактоза
Адвант препаратының құрамында 110,735 мг және 147.200 мг мөлшердегі лактоза бар. Тұқым қуалайтын галактоза жақпаушылығы, Lapp (ЛАПП)-лактаза ферментінің тапшылығы немесе глюкоза мальабсорбциясы бар пациенттерде бұл препаратты қолдануға болмайды.
Жүктілік жағдайындағы ескертулер
Жүктілік кезінде қолданбаған дұрыс. Егер емдеуді жалғастыру қажет деп есептелсе, жүктілікті жоспарлап жүрген пациент әйелдерді жүктілік кезінде пайдалану үшін қауіпсіздік бейіні анықталған баламалы гипотензиялық препараттарға ауыстыру керек. Жүктілік расталған жағдайда, Адвант препаратымен емдеуді дереу тоқтату және қажет болған жағдайда баламалы емін бастау керек. Постменархе кезеңіндегі пациент әйелдерде жүкті болуы мүмкіндігін жүйелі түрде бағалап отыру керек. Жүктілік кезінде қолдану қаупінің алдын алу үшін, тиісінше ақпарат беру қажет.
Бауыр жеткіліксіздігі
Тиазидтерді бауыр функциясы бұзылған немесе үдемелі аурулары бар пациенттерде абайлап қолдану керек, өйткені су-электролит теңгерімінің болар-болмас өзгерістері бауыр комасына түрткі болуы мүмкін. Бауыр жеткіліксіздігімен пациенттерде Адвантты қолданудың клиникалық тәжірибесі болмаған.
Бүйрек жеткіліксіздігі
Бүйрек функциясы бұзылған пациенттерде Адвант препаратын қолданған жағдайларда калийдің, креатининнің және несеп қышқылының деңгейлерін мезгіл-мезгіл бақылап отыру ұсынылады.
Жуырда бүйрек трансплантациясын бастан өткерген пациенттерде Адвант препаратын қолдану тәжірибесі болмаған.
Басқа дәрілік препараттармен өзара әрекеттесуі
Фармакокинетикалық өзара әрекеттесулері жөніндегі деректер гидрохлоротиазид, варфарин, дигоксин, пероральді контрацептивтер (мысалы, этинилэстрадиол / левоноргестрел), глибенкламид, нифедипин және эналаприл дәрілік заттарын қамтиды. Аталған дәрілік заттармен клиникалық тұрғыдан елеулі фармакокинетикалық өзара әрекеттесулері болмаған.
Калий жинақтайтын диуретиктерді, калий қоспаларын, құрамында калий бар тұз алмастырғыштарды, немесе басқа дәрілік заттарды (мысалы, гепаринді) бір мезгілде қабылдау калий деңгейін арттыруы мүмкін. Қажет болса, калий деңгейіне мониторинг жүргізу керек.
Литийді ангиотензин-өзгертуші фермент (АӨФ) тежегіштерімен немесе гидрохлоротиазидпен бір мезгілде қолданғанда,қан плазмасындағы литий концентрациясының және оның уыттылығының қайтымды жоғарылағаны туралы хабарламалар бар. Мұндай әсері туралы ангиотензин ІІ рецепторының антагонистерін қолданғанда да хабарланды. Кандесартан мен гидрохлоротиазидті литиймен пайдалану ұсынылмайды. Біріктіріп қолдану қажет болған жағдайда, қан плазмасындағы литий деңгейін мұқият бақылау ұсынылады.
Ангиотензин ІІ рецепторларының антагонистерін қабынуға қарсы стероидты емес препараттармен (ҚҚСП) (мысалы, ЦОГ-2 селективті тежегіштері, ацетилсалицил қышқылы (тәулігіне > 3 г) және селективті емес ҚҚСП) бір мезгілде қолданған жағдайда, гипертензияға қарсы әсерінің төмендеуі орын алуы мүмкін.
АӨФ тежегіштерін қолданғандағы сияқты, ангиотензин ІІ рецепторларының антагонистері мен ҚҚСП бір мезгілде қолдану бүйректің жедел жеткіліксіздігінің болуы мүмкіндігін, сондай-ақ, әсіресе, анамнезде бүйрек функциясының бұзылуы болған жағдайдағы гиперкалиемияны қоса, бүйрек жеткіліксіздігінің даму қаупін арттыруы мүмкін.
Біріктірілімді, әсіресе, егде жастағы адамдарға сақтықпен тағайындау керек. Пациенттер сұйықтықты жеткілікті мөлшерде ішуі тиіс, және қатарлас емдеуді бастағаннан кейін және содан соң жүйелі түрде бүйрек функциясын мониторингілеу керек.
АӨФ тежегіштерін, ангиотензин II рецепторларының блокаторлары немесе алискиренді біріктіріп қолданудың есебінен жүргізілетін ренин-ангиотензин-альдостерон жүйесінің (РААЖ) қосарлы блокадасы, РААЖ-ге әсер ететін бір агентті қолданумен салыстырғанда, гипотензия, гиперкалиемия және т.б., бүйрек функциясының төмендеуі (бүйректің жедел жеткіліксіздігін қоса) сияқты жағымсыз құбылыстар жиілігінің жоғарырақ болуымен байланыстырылады.
Балалар
Өзара әрекеттесулерін зерттеулер тек ересектерде жүргізілді.
Арнайы ескертулер
Педиатрияда қолданылуы
Препаратты балалар мен 18 жасқа дейінгі жасөспірімдерде қолдану ұсынылмайды (қолданылуының қауіпсіздігі және тиімділігі анықталмаған).
Жүктілік немесе лактация кезінде
Жүктілік
Жүкті әйелдерде кандесартанды қолдану тәжірибесі шектеулі. Жүктіліктің I триместрінде шарана үшін ықтимал қауіптілігі туралы айту үшін бұл деректер жеткіліксіз.
Адамның эмбрионында РААЖ дамуына байланысты бүйректі қанмен қамту жүйесі жүктіліктің II триместрінде қалыптаса бастайды: кандесартанды жүктіліктің соңғы 6 айында тағайындағанда, шарана үшін қауіп арта түседі.
Препаратты жүктіліктің соңғы алты айында қолданғанда, РААЖ-ге тікелей әсер ететін дәрілер шарана дамуында өлімге соқтыруы мүмкін бұзылуларды туғызуы немесе жаңа туылған нәрестеге теріс әсер етуі мүмкін (артериялық гипотензия, бүйрек функциясының бұзылуы, олигурия және/немесе анурия, олигогидрамнион, бассүйек сүйектерінің гипоплазиясы, құрсақтағы дамудың кідіруі). Сондай-ақ өкпе гипоплазиясы, бет аномалиялары және аяқ-қол контрактурасы жағдайлары сипатталған.
Эмбриональді және неонатальді кезеңдерде кандесартанды қолдану кезінде бүйректің зақымданғаны жөнінде деректер бар. Әйелдерде жүктілік кезінде қолдануға болмайды.
Бала емізу.
Кандесартанды бала емізу кезінде қолдану жөнінде ақпарат жоқ болғандықтан, әйелдерде лактация кезінде Адвант дәрілік препаратын қолдануға болмайды.
Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері
Автомобиль басқару және механизмдермен жұмыс істеу қабілетіне ықпалын зерттеулер жүргізілмеген.
Көлік құралын басқарғанда немесе механизмдермен жұмыс істегенде, кейде кандесартанмен емдеу кезінде бас айналуы мен шаршау туындауы мүмкін екендігін ескеру керек.
Қолдану жөніндегі нұсқаулар
Дозалау режимі
Артериялық гипертензия
Адванттың ұсынылатын бастапқы және демеуші дозасы тәулігіне 1 рет 8 мг-ды құрайды. Артериялық қысымын бұдан әрі төмендету талап етілетін пациенттерге дозасын тәулігіне 1 рет 16 мг-ге дейін арттыру ұсынылады. Гипертензияға қарсы ең жоғары әсеріне емдеу басталған күннен бастап 4 апта ішінде жетеді.
Егер Адвантпен емдеу артериялық қысымның оңтайлы деңгейге төмендеуіне дейін алып келмесе, емге тиазидтік диуретикті қосу ұсынылады.
Жүректің созылмалы жеткіліксіздігі
Адванттың ұсынылатын бастапқы дозасы тәулігіне 1 рет 4 мг құрайды. Дозасын тәулігіне бір рет 32 мг-ге дейін немесе ең жоғарғы жағымды дозасына дейін арттыру оны кемінде 2 апта аралықпен екі еселеу жолымен жүргізіледі.
Пациенттердің ерекше топтары
Балалар
Балаларда мен жасөспірімдерде (18 жасқа дейінгі) Адвантты қолдану қауіпсіздігі және тиімділігі анықталмаған.
Егде жастағы пациенттер
Егде жастағы пациенттерге және бүйрек функциясының бұзылуымен немесе бауыр функциясының ауырлығы жеңіл немесе орташа дәрежелі бұзылуымен пациенттерге препараттың бастапқы дозасын қажет емес.
Бауыр жеткіліксіздігі бар пациенттер
Бауыр функциясының ауырлығы жеңіл және орташа дәрежеде бұзылуымен пациенттерде емдеуді тәулігіне 1 рет 2 мг тәуліктік дозасымен бастау ұсынылады. Қажет болған жағдайда, дозасын арттыруға болады. Бауырдың ауыр зақымданулары бар науқастарда қолданудың клиникалық тәжірибесі шектеулі.
Бүйрек жеткіліксіздігі бар пациенттер
Гемодиализдегі пациенттерді қоса, бүйрек жеткіліксіздігі бар пациенттер үшін препараттың бастапқы дозасы 4 мг құрайды. Дозасын жауапқа сәйкес титрлеу керек.
Бүйректің ауыр немесе терминальді жеткіліксіздігімен (креатинин клиренсі <15 мл / мин) пациенттерді емдеу тәжірибесі шектеулі.
Енгізу әдісі және жолы
Ішке қолданылады.
Адвант препаратын ас ішуге байланыссыз, тәулігіне 1 рет қабылдау керек.
Артық дозаланған жағдайда қолдану қажет шаралар
Симптомдары: препарат артық дозаланған (672 мг-ге дейінгі кандесартан цилексетилін), пациенттердің ауыр салдарларсыз сауығып кетуімен аяқталған жекелеген жағдайлар сипатталған. Сонымен қатар, бас айналуы, АҚ төмендеуі, ауыздың құрғауы, тахикардия, қарынша аритмиясы, седация, естен тану және бұлшықет құрысулары сияқты симптомдар байқалды.
Емі: құстыру немесе асқазанды шаю, симптоматикалық ем және өмірлік маңызы бар функцияларға мониторинг жүргізу. Пациентті аяқтарын көтеріңкіреп, шалқасынан жатқызу керек. Қажет болған жағдайда – су-электролит теңгерімін қалпына келтіруге бағытталған іс-шаралар, симпатомиметикалық дәрілерді тағайындауға болады. Кандесартан гемодиализдің көмегімен шығарылмайды.
Дәрілік препараттың қолдану тәсілін түсіндіру үшін медицина қызметкерінің кеңесіне жүгіну бойынша нұсқаулар.
Сізде осы дәрілік препаратты қолдану жөнінде қандай-да бір қосымша сұрақтар туындаған жағдайда, өз дәрігеріңізге немесе фармацевтке жүгініңіз.
ДП стандартты қолдану кезінде көрініс табатын жағымсыз реакциялардың сипаттамасы және осы жағдайда қабылдануы керек шаралар
Жиі
- тыныс алу жолдарының инфекциясы
- бас айналуы/вертиго, бас ауыруы
Өте сирек
- лейкопения, нейтропения және агранулоцитоз
- гиперкалиемия, гипонатриемия
- жөтел
- жүрек айнуы
- бауыр ферменттері белсенділігінің жоғарылауы, бауыр функциясының бұзылуы немесе гепатит
- Квинке ісінуі, бөртпе, есекжем, қышыну
- арқаның ауыруы, артралгия, миалгия
- бүйрек жеткіліксіздігі, соның ішінде, бейім пациенттерде бүйрек функциясының бұзылуы
Жүрек жеткіліксіздігін емдеу кезіндегі жағымсыз реакциялар
Жиі
- гиперкалиемия, гипотония, бүйрек жеткіліксіздігі, соның ішінде, бейім пациенттерде бүйрек функциясының бұзылуы
Өте сирек
- лейкопения, нейтропения және агранулоцитоз
- гипонатриемия
- бас айналуы, бас ауыруы
- жөтел
- жүрек айнуы
- бауыр ферменттері белсенділігінің жоғарылауы, бауыр функциясының бұзылуы немесе гепатит
- Квинке ісінуі, бөртпе, есекжем, қышыну
- арқаның ауыруы, артралгия, миалгия
Гиперкалиемия мен бүйрек жеткіліксіздігі Адвант препаратын жүрек жеткіліксіздігі көрсетілімдері қабылдаған пациенттерде жиі кездеседі. Сарысудағы креатинин мен калийге жүйелі түрде мониторинг жүргізу ұсынылады.
Жағымсыз дәрілік реакциялар туындаса медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаларды қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей хабарласыңыз
«Қазақстан Республикасы Денсаулық сақтау министрлігі Тауарлар мен көрсетілетін қызметтердің сапасы мен қауіпсіздігін бақылау комитеті Дәрілік заттар мен медициналық бұйымдарды сараптау ұлттық орталығы» ШЖҚ РМК
Қосымша мәліметтер
Дәрілік препараттың құрамы
Бір таблетканың құрамында:
белсенді зат - 8 мг, 16 мг кандесартан цилексетилі,
қосымша заттар (8 мг дозасы): лактоза моногидраты (лактоза регулар), фармакоат 606 (НРМС), полисорбат 80, кальций карбоксиметилцеллюлозасы, магний стеараты, темірдің сары тотығы (Е172).
қосымша заттар (16 мг дозасы): лактоза моногидраты (лактоза регулар), фармакоат 606 (НРМС), полисорбат 80, кальций карбоксиметилцеллюлозасы, магний стеараты.
Сыртқы түрінің иісінің, дәмінің сипаттамасы
Сарғыш түсті, шаршы пішінді және жиектері доғал, екі беті дөңес, бір жағында сызығы бар және келесі жағы тегіс таблеткалар (8 мг дозасы үшін).
Ақ түсті, шаршы пішінді және жиектері доғал, екі беті дөңес, бір жағында сызығы бар және келесі жағы тегіс таблеткалар (16 мг дозасы үшін).
Шығарылу түрі және қаптамасы
Препарат 7 таблеткадан лакталған алюминий фольгадан жасалған пішінді ұяшықты қаптамаға салынған.
2 пішінді қаптама медициналық қолдану жөніндегі қазақ және орыс тілдеріндегі нұсқаулықпен бірге картоннан жасалған қорапшаға салынады.
Сақтау мерзімі
Сақтау мерзімі 3 жыл
Жарамдылық мерзімі өткеннен кейін қолдануға болмайды!
Сақтау шарттары
Құрғақ және жарықтан қорғалған жерде, 15°С-ден 30°С-ге дейінгі температурада сақтау керек.
Балалардың қолы жетпейтін жерде сақтау керек!
Дәріханалардан босатылу шарттары
Рецепт арқылы.
Өндіруші туралы мәлімет
Гетц Фарма (Пвт.) Лимитед, Пәкістан,
29-30/27, К.И.А. , Карачи – 74900.
Тел: +(92-21) 111 111 511
Факс: +(92-21) 350 5792
e-mail: info@getzpharma.com
Тіркеу куәлігінің ұстаушысы
Гетц Фарма (Пвт.) Лимитед, Пәкістан,
29-30/27, К.И.А. , Карачи – 74900.
Тел: +(92-21) 111 111 511
Факс: +(92-21) 350 5792
e-mail: info@getzpharma.com
Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын ұйымның атауы, мекенжайы және байланыс деректері (телефон, факс, электронды пошта):
Гетц Фарма (Пвт.) Лимитед компаниясының ҚР өкілдігі
Алматы қ., Шевченко к-сі, 148 үй
Тел: +7(727)378-51-89, 378-54-78
haroon.rashid@getzpharma.com
Қазақстан Республикасы аумағында дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)
«ConsultAsia» ЖШС
Шевченко к-сі 165Б
050061, Алматы, Қазақстан,
Тел.: +7705-1708825/+7777-8051116
pv@consultingasia.kz