Біздің компаниямыз жайлы жалпы ақпарат.
Дәрілік затты медициналық қолдану жөніндегі нұсқаулық
Релиф® Адванс
Саудалық атауы
Релиф® Адванс
Халықаралық патенттелмеген атауы
Бензокаин
Дәрілік түрі
Ректальді суппозиторийлер
Құрамы
1 суппозиторийдің құрамында
белсенді зат: 206 мг бензокаин,
қосымша заттар: какао майы (теобром майы), метилпарагидроксибензоат, пропилпарагидроксибензоат, жүгері крахмалы.
Сипаттамасы
Пішіні торпеда тәрізді, мөлдір емес, түсі бозғылт-ақтан ақшыл-сары түске дейінгі суппозиторийлер.
Фармакотерапиялық тобы
Жүрек-қантамыр жүйесі. Вазопротекторлар. Геморрой және анальді сызаттарды емдеу үшін жергіліктіқолдануға арналғандәрілер. Жергілікті анестетиктер. Бензокаин.
АТХ коды C05АD03.
Фармакологиялық қасиеттері
Фармакокинетикасы
Бензокаинді жергілікті қолданғанда Релиф Адванс препаратында жүйелік сіңуі төмен.
Фармакодинамикасы
Бензокаин – беткейлік белсенді жергілікті жансыздандыратын дәрі, резорбтивті әсер етпейді, натрий иондары үшін жасуша жарғақшасының өткізгіштігін азайтады, жарғақшалардың ішкі беткейінде орналасқан рецепторлардан кальций иондарын ығыстырады, жүйке импульстарының өткізілуін бөгейді. Бензокаин айқын ауыруды басатын әсер етеді.
Қолданылуы
- сыртқы және ішкі геморройда
- айқын ауыру синдромымен қатар жүретін артқы өтіс жолының сызатында, эрозиясында және микрожарақаттарында, анальді қышынуда
- проктологиялық операциялардан соң операциядан кейінгі кезеңде
Қолдану тәсілі және дозалары
Препаратты гигиеналық шаралардан кейін қолдану керек. 1 суппозиторийден тік ішекке тәулігіне 4 ретке дейін (таңертең, түнге қарай және ішекті әр босатқаннан кейін) енгізу керек. Ең жоғары тәуліктік дозасы – 4 суппозиторий. Емдеу курсының ұзақтығы – 7 күн.
Қажет болғанда дәрігердің ұсынымы бойынша қабылдау ұзақтығын 3 аптаға дейін ұзартуға болады.
Жағымсыз әсерлері
Сирек
- гиперемия (эритема), ісіну, препаратты қолданған аймақтағы тері бөртпелері
- аллергиялық дерматит
- метгемоглобинемия.
Қолдануға болмайтын жағдайлар
- препарат компоненттерінің кез келгеніне әркімдегі жеке жоғары сезімталдық
- 12 жасқа дейінгі балаларға
- жүктілік және лактация кезеңі
Дәрілермен өзара әрекеттесуі
Релиф Адванс құрамына кіретін бензокаин аминосалицил қышқылының препараттарына антагонист болуы мүмкін.
Бензокаин ұсынылатын дозасын айтарлықтай жоғарылатқан жағдайда және ұзақ уақыт қолданғанда моноаминооксидаза (МАО) тежегіштерінің, антидепрессанттар және гипотензиялық дәрілердің әсерін күшейтуі мүмкін.
Айрықша нұсқаулар
Емдеу курсының жиілігі (4 ретке дейін) мен ұзақтығын арттыруға болмайды. Құрамында бензокаин бар өнімдерді тағайындау метгемоглобинемияға әкелетінін көрсететін зерттеулер бар. Препарат қолдану аясындағы цианоз (бозару, тері, ерін және тырнақ оймасы түсінің сұрлануы немесе көгеруі), бас ауыруы, бас айналуы, диспноэ (ентігу), шаршау, тахикардия сияқты симптомдар өмірге ықтимал қауіпті көрсетуі мүмкін және тікелей медициналық қадағалауды қажет етеді.
Артқы өтістен көп мөлшерде қанды бөліністер болған жағдайда немесе ауыру симптомдары 7 күннен астам сақталғанда, проктологтан қосымша кеңесу қажет.
Релиф Адванс препаратын 12 жастан асқан балаларда қолданар алдында дәрігермен кеңесіңіз.
Егер анустан қан кету туындайтын болса, пациент дәрігерге қаралуы керек.
Жүктілік және бала емізу кезеңі
Жүктілік кезінде ықтимал пайдасы шаранаға төнетін қауіпті ақтайтын болса ғана, препарат қолданылуы мүмкін.
Жүктілік және бала емізу кезінде препаратты дәрігердің тағайындауы бойынша қолданған жөн.
Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері
Әсер етпейді.
Артық дозалануы
Симптомдары: бензокаиннің артық дозалануы жүрек ырғағының бұзылуын, құрысуды, команы, тыныс алу жиілігінің азаюы немесе тыныс алу жеткіліксіздігін туындатуы мүмкін.
Емі: препаратты тоқтату және симптоматикалық ем.
Шығарылу түрі және қаптамасы
6 суппозиторийден поливинилхлорид/полиэтилен үлбірден жасалған пішінді ұяшықты қаптамада.
2 пішінді қаптамадан медициналық қолдану жөніндегі мемлекеттік және орыс тіліндегі нұсқаулықпен бірге картон қорапшаға салынады.
Сақтау шарттары
25 °С-ден аспайтын температурада сақтау керек.
Балалардың қолы жетпейтін жерде сақтау керек!
Сақтау мерзімі
2 жыл.
Жарамдылық мерзімі өткеннен кейін қолдануға болмайды.
Дәріханалардан босатылу шарттары
Рецептісіз.
Өндіруші ұйымның атауы және елі
Иституто Де Анжели С.р.л.,
50066 Рeггелло (Флоренция), Лок. Прулли 103/c, Италия
Тіркеу куәлігі ұстаушысының атауы және елі
Байер Консьюмер Кэр АГ, Швейцария
Қазақстан Республикасы аумағында тұтынушылардан дәрілік заттың сапасына қатысты шағымдарды (ұсыныстарды) қабылдайтын ұйымның атауы, мекенжайы және байланыс деректері (телефон, факс, электрондық пошта)
«Байер КАЗ» ЖШС
Тимирязев к-сі, 42, 15 павильон, 301 кеңсе
050057 Алматы, Қазақстан Республикасы,
тел. +7 727 258 80 40, факс: +7 727 258 80 39
e-mail: kz.claims@bayer.com
Қазақстан Республикасы аумағында дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электрондық пошта)
«Байер КАЗ» ЖШС
Тимирязев к-сі, 42, 15 павильон, 301 кеңсе
050057 Алматы, Қазақстан Республикасы,
тел: +7 701 715 78 46 (тәулік бойы)
тел:+7 727 258 80 40, ішкі 106(жұмыс уақытында)
факс: +7 727 2588 039
e-mail: pv.centralasia@bayer.com
Егер сіз жағымсыз жағдай туралы немесе препараттың сапасы туралы хабарлағыңыз келсе, денсаулық сақтау саласындағы маманына (мысалы, дәрігер немесе фармацевт) немесе бақылаушы органдарына жүгініңіз. Сонымен қатар, өтініштерді pv.centralasia@bayer.com мекен-жайына жіберуге болады немесе +7 701 715 78 46 телефонына хабарласуға болады.
